Føroyar hava ein skipaðan arbeiðsmarknað, kortini eru sera fáar arbeiðsmarknaðarlógir í Føroyum.
Fleiri av arbeiðsmarknaðarlógunum eru avoldaðar, t.d. eru nakrar frá 1930’unum.

Samtak mælir til, at endurskoða verandi lóggávu, at dagføra lógir og veruliga at kanna, um allar lógir og reglugerðir verða hildnar. Eitt nú er týðandi at vita, um t.d. lógin um arbeiðaravernd kundi verið betri og um lógin og kunngerðirnar verða hildnar. Ivi kann í nógvum førum vera um, at hugtakið arbeiðsumhvørvi ikki verður tikið í nóg stórum álvara.

Javnstøðulógin er eftirhondini vorðin 24 ár, og kanska er stundin komin at betra um hesa lóggávu. Hóast lógin hevur verið í gildi síðani 1994 er hvørki javnstøða á arbeiðsmarknaðinum ella har politiskar avgerðir sum heild verða tiknar. Ynskiligt hevði verið, um tað almenna slóðaði fyri, at ein verulig javnstøðuætlan bleiv sett í verk.

Samferðslumálaráðið umsitur arbeiðsmarknaðarlóggávuna. Siðvenja er, at løn og setanartreytir verða avtalaðar partanna millum heldur enn skipaðar við lóggávu, og tí er lóggávan um hetta avmarkað soleiðis, at hon einamest skipar eina ávísa minstuverju, t.d. í sambandi við setanartreytir, barnsburð, javnstøðu, bann móti mismuni o.tíl.
Eisini Arbeiðs- og brunaeftirlitið, ið er arbeiðs- og brunaeftirlitsmyndugleiki landsins er partur av málsøkinum hjá Samferðslumálaráðnum. Lógin um ALS, barsilsskipanin v.m hoyra eisini til Samferðslumálaráðið.